เหตุปจฺจโย
[67] เหตุ เจว สเหตุโก จ อพฺยากโต ธมฺโม เหตุสฺส เจว สเหตุกสฺส จ อพฺยากตสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ
[68] เหตุยา ตีณิ, อารมฺมเณ นว, อธิปติยา นว, อนนฺตเร นว, สมนนฺตเร นว, สหชาเต นว, อญฺญมญฺเญ นว, นิสฺสเย นว, อุปนิสฺสเย นว, อาเสวเน นว, กมฺเม ตีณิ, วิปาเก นว, อาหาเร ตีณิ…เป.… อวิคเต นว (สํขิตฺตํ)ฯ
ปจฺจนียุทฺธาโร
[69] เหตุ เจว สเหตุโก จ อพฺยากโต ธมฺโม เหตุสฺส เจว สเหตุกสฺส จ อพฺยากตสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย (สํขิตฺตํ)ฯ
[70] นเหตุยา นว, นอารมฺมเณ นว (สํขิตฺตํ)ฯ
เหตุปจฺจยา นอารมฺมเณ ตีณิ (สํขิตฺตํ)ฯ
นเหตุปจฺจยา อารมฺมเณ นว (สํขิตฺตํ)ฯ
(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)
เหตุสเหตุกทุกกุสลตฺติกํ นิฏฺฐิตํฯ
5-1. เหตุเหตุสมฺปยุตฺตทุก-กุสลตฺติกํ
1. กุสลปทํ
1-6. ปฏิจฺจวาราทิ
ปจฺจยจตุกฺกํ
เหตุปจฺจโย
[71] เหตุญฺเจว เหตุสมฺปยุตฺตญฺจ กุสลํ ธมฺมํ ปฏิจฺจ เหตุ เจว เหตุสมฺปยุตฺโต จ กุสโล ธมฺโม อุปฺปชฺชติ เหตุปจฺจยาฯ เหตุญฺเจว เหตุสมฺปยุตฺตญฺจ กุสลํ ธมฺมํ ปฏิจฺจ เหตุสมฺปยุตฺโต เจว น จ เหตุ กุสโล ธมฺโม อุปฺปชฺชติ เหตุปจฺจยา (สํขิตฺตํ)ฯ
[72] เหตุยา นว, อารมฺมเณ นว…เป.… อวิคเต นว (สํขิตฺตํ)ฯ
นอธิปติปจฺจโย
[73] เหตุญฺเจว เหตุสมฺปยุตฺตญฺจ กุสลํ ธมฺมํ ปฏิจฺจ เหตุ เจว เหตุสมฺปยุตฺโต จ กุสโล ธมฺโม อุปฺปชฺชติ นอธิปติปจฺจยา (สํขิตฺตํ)ฯ
[74] นอธิปติยา นว, นปุเรชาเต นว, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นวิปฺปยุตฺเต นว (สํขิตฺตํ)ฯ
เหตุปจฺจยา นอธิปติยา นว (สํขิตฺตํ)ฯ
อธิปติปจฺจยา เหตุยา นว (สํขิตฺตํ)ฯ
(สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ ปฏิจฺจวารสทิสา วิตฺถาเรตพฺพาฯ)
7. ปญฺหาวาโร
ปจฺจยจตุกฺกํ
เหตุปจฺจโย
[75] เหตุ เจว เหตุสมฺปยุตฺโต จ กุสโล ธมฺโม เหตุสฺส เจว เหตุสมฺปยุตฺตสฺส จ กุสลสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ
[76] เหตุยา ตีณิ, อารมฺมเณ นว, อธิปติยา นว, อนนฺตเร นว…เป.… อาเสวเน นว, กมฺเม ตีณิ, อาหาเร ตีณิ…เป.… อวิคเต นว (สํขิตฺตํ)ฯ
ปจฺจนียุทฺธาโร
[77] เหตุ เจว เหตุสมฺปยุตฺโต จ กุสโล ธมฺโม เหตุสฺส เจว เหตุสมฺปยุตฺตสฺส จ กุสลสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย (สํขิตฺตํ)ฯ
